榮升「最美麗嫲嫲」嘅朱玲玲，今日同歷屆港姐向海嵐、劉倩婷、王愛倫、莫可欣等人去又一城出席「學生學習計劃」頒獎禮。

朱玲玲熱愛攝影，連啟剛同晶晶同孫仔嘅一家三口照發相都係由佢操刀，佢就話幫孫影相時特別冧，咁會唔會幫孫仔出相集？佢笑笑口話﹕「BB成日瞓覺，好多相都係合埋眼。但如果出相集，啟剛一定第一個反對，因為佢唔想BB相喺網上流傳，覺得都係私人啲好，想自己睇。」佢又話BB未必會跟族譜改名，暫時都係叫「Baby」，又透露郭晶晶餵人奶，所以瘦得好快。

咁孫仔話晒係霍家第一粒孫，唔知百日宴會唔會大搞？朱玲玲話﹕「未決定，上次搞結婚太辛苦，好多功夫，所以都未必會。」佢亦唔心急再飲新抱茶，話啟山同啟仁宜家要專注事業。

09年港姐冠軍劉倩婷啱啱同老公李丞責去完旅行返港，問佢有冇留意出爐港姐冠軍陳凱琳講公投港姐，伸延嘅政治風波？佢話唔清楚，但就好贊同志偉話港姐唔應該參予太多政治話題，問係咪畀新聞部擺上枱？佢就話﹕「唔係，當年我選完都有接受新聞部訪問，點答係一個方式，都唔一定要畀個人意見。」