上周，有單新聞，如果喺2008年前發生，一定係國際財經大新聞，一定引起大動盪。不過因為多國政府攞納稅人同未來多代子民作抵押品，向亂借錢、使錢、還唔到嘅人包底、包底、再包底後，變成一單冇人提嘅新聞。
究竟係乜？就係德意志銀行（Deutsche Bank）嘅信貸評級由A降至BBB+。咁即係咩意思？你問得，等於你係嗰啲冇經歷過金融海嘯嘅人。因為喺2007年暑假，記得當年同青姐（胡孟青）做節目，佢漫不經心話當時喺銀行買賣債券嘅交易員返工冇嘢做，因為當時債市「停頓」。點解停咗呢？其中最大原因，就係銀行與銀行之間唔信對方能夠做到交收，起碼其中一方走數唔係信貸評級公司認為「完全冇可能」。
咁喺2008年前嘅世界，當你連A都冇時，基本上你可以結束任何要做交收又場外嘅交易。有人管嘅場（例如喺港交所代表客戶買港股）內都仲有人同你買賣，不過冇人管嘅場外（例如某國家嘅債券）就會越來越難做交易，又或者弱方會被要求交多啲按金資產做抵押品。
而最大問題，就係銀行嘅分別有幾大呢？如果一間忽然被降級，佢裏面一定有啲已壞或就快壞嘅賬，其他銀行都應該有中招。今次德意志銀行究竟有啲乜會俾人降信貸評級呢？