E-kids喺旺角麥花臣場館舉行一連兩場《E-kids AGAIN 2018》演唱會，噚晚係頭場，張立基擔任表演嘉賓，嚟睇騷嘅就有甄詠珊、韓馬利等，入座率約七成，阮民安（Tommy）仲首次帶埋囝囝阮治童上台。

Tommy染咗個紅色頭，郁禮賢（Tim）染藍色，而林詠倫（Alan）就駁髮，三子一出場就勁歌熱舞，唱咗《最佳表情》、《魅力移動》，跟住唱《第一個唱》時就繞場一周，同fans握手，Tommy大嗌全場觀眾起身，fans都好High。

跟住唱《一二三四》時，Tommy話：「就嚟甩褲喇！大家係咪想睇腹肌呢？」不過最後佢都係冇騷肌嘅。Tommy話繼續話：「《一二三四》係03年，嗰時我哋仲係kids，大家好了解我嘅私心，但就一直問我點解唔介紹屋企人出嚟畀大家認識，今晚第一位嘉賓我想同台好耐，呢個小朋友相信會係我未來下半生最重要嘅人。其實我喺2017年成為爸爸，希望今晚介紹畀大家識。」跟住佢就抱咗個仔出場，不過囝囝一出場就爆喊，冷靜過後，囝囝冇喊，亦有同觀眾揮手。

solo環節，Alan唱《浮誇》騷肌，之後唱《芳華絕代》，同兩個dancer貼身自摸，又同個男dancer脷疊脷濕吻10秒，嚇到全場尖叫。之後三子合唱張國榮嘅《追》，尾聲時大銀幕分別播出各自成員嘅家人合照。

嘉賓張立基出場唱《Electric Girl》，Tommy話想搞part向八、九十年代快歌手致敬環節：「唱得快歌又實力飛凡嘅歌手唔多，所以今日好開心邀請佢出山。」張立基話：「好欣賞E-kids，佢哋真係好潮，令我今日都覺得自己後生咗。」最後王宗堯幫佢哋拍咗短片，貫穿幾首慢歌，鄭丹瑞為佢哋拍片講鼓勵說話，仲話下個紅館個唱見。

完騷之後，三子喺後台接受訪問，Tommy講到點解會帶個仔上台：「冇咩畀到個仔，咁多年大家睇到我嘅都係啲唔好嘅報道，今時今日帶個仔上台畀大家肯定佢。」點解唔帶埋老婆上台？Tommy話：「因為佢幫我哋整緊啲衫，我哋出台衫喺佢親手整，成世人最幸運係做到E-kids，跟住就係識到太太，生咗個咁得意嘅BB，下個禮拜，初二佢就一歲生日，會帶佢出去逗利是。」

至於Alan同男Dancer咀到伸脷，佢話：「綵排時冇㗎，佢係排舞老師，去到個part佢直情伸埋條脷出嚟，Tommy同Tim都有老婆，呢啲嘢留番我嚟做，個一刻佢錫過嚟嘅時候，我都估唔到，心諗你做咩呀?」不過Tommy就踢爆Alan平時唱卡拉ok，飲大兩杯就會周圍錫人，Alan重申：「脷疊脷㗎喎！」另外，Tommy話要多謝鄭丹瑞同王宗堯幫手，尤其係艾粒一個電話就嚟幫手，不過因為rundown過長，最後cut咗佢哋嗰part，所以好對唔住艾粒。

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent