曼聯上場聯賽輸咗畀阿仙奴0:2，但都有一個好消息，就係冇人喺呢場波受傷。曼聯嚟緊禮拜四會出戰歐霸盃四強次回合，主場對切爾達；喺周三嘅操練，有20名一隊球員如常訓練，包括拉舒福特、保羅普巴同艾歷拜利等主將。

雖然伊巴謙莫域、馬高斯盧祖、勞基梳爾、艾舒利楊格同科素文沙五名長期傷兵繼續休息，但對阿仙奴場聯賽冇新增傷兵，都算係好消息。喺周三，有20個一隊球員喺卡靈頓訓練中心操練，包括上場聯賽冇份落場嘅普巴、拜利、路爾斯華倫西亞同埋費蘭尼，而有後備落場嘅拉舒福特都冇傷冇病，周三有操。安達靴里拉、桑馬達、米希達利恩、菲爾鍾斯、基斯史摩寧呢啲主將亦喺齊度。除咗20名一隊成員，仲有四名小將被提升咗上嚟一齊操，包括上場對阿仙奴有份踢嘅麥湯文拿。