莫雷拉獨大局面難阻，但近期田泰安及羅理雅都頻頻贏馬，表現不甘示弱，而且他們的頭馬通常有唔錯賠率。今期田泰安及羅理雅分別接手騎第一場「多多勁驥」及第四場「喜悅明駒」，兩駒上仗都跑得接近，這次有條件爭勝。

第一場四班1200米：最近三仗曾上名只有「財高八斗」，形勢看似單純，但「財高八斗」上仗初出一放到底贏同程跑姿仍稚嫩，三歲馬今次孭重七磅，可爭不穩！反而「多多勁驥」季初曾在三班同程1200米得第四，當日此駒不放而留，並非最佳跑法，竟可跑贏「麯院風荷」，證明田草一樣掂。上仗谷草1200米頭兩段放得太快，亦捱到最後百五米才力弱失三甲，表現相當唔錯。今季已減咗八分，今場強配近期手風順的田泰安，排四檔形勢有利，穩位望贏。

第四場四班1400米，「喜悅明駒」在新西蘭試過兩次800米閘，都是前段落後，直路追勢悅目，睇腳法宜跑中距離。前仗在港初出跑直路賽，沿途在後叠跟跑，純粹熱身性質。上仗跑1200米前段步速偏慢，仍能後上跑第四，直路望空後追勢強勁，同父馬「辣得很」、「大笑大少」專贏1400米，今次跑長二百米肯定更加啱追，可望打開勝門。