上周本欄提及勞永樂醫生的「選舉工程」，引起了好些人嘅興趣，更有朋友親自打電話畀進士，指出我需要查找不足，因為勞醫生又再另有所圖嘞！
話說家陣區議會嘅議席仍有一定吸引力，講嘅並唔係區議員本身嘅職權，而係現屆區議員能參與六月開打嘅選委會選舉（新界及市區分別各提供二十一個選委會席位）。就係咁，連區議會有機會出現補選嘅席位都出現「開踭」搶位嘅情況。
沙田區議員黃國雄早前涉及貪污指控被定罪，目前正在安排上訴當中，佢喺馬鞍山嘅席位又引起勞醫生嘅興趣。不過，原來沙田區議會副主席民建聯嘅彭長緯又想擺自己囡囡落去選，咁就解釋咗點解早幾星期勞醫生出現喺民建聯個聚會度囉！

蔡元雲應讓位

進士對勞醫生其實冇乜過節，講真，要數「我最討厭的醫生」，我會選蔡元雲啦！以前恃住老董睇佢，就成日老點啲公務員兄弟，自以為好了解年輕人同細路，一日到黑諗埋晒啲唔等使嘢。搞青年事務，連348同Sugar都未知係乜。搞細路，諗個乜鬼嘢「先導計劃」，嘈完一輪又係得個吹字！幫煲呔拍短片谷政改方案，又唔知點解關佢事？都一把年紀，係錫住青年人就唔該早啲退休，咪阻住啲後浪啦！
最後，為免俾人覺得進士針對啲大國手，喺度幫人賣少少廣告（希望老編唔會插我）。近來進士喜歡上史泰祖醫生喺另外一份報章嘅專欄，唔知係咪因為佢好友張炳良加入咗行政會議對佢帶嚟咗新嘅衝擊，近來史醫生寫嘢愈嚟愈有見地。希望史醫生可以keep到啦，我哋寫嘢有時都好需要參考多啲人哋嘅獨立觀點，否則自己會變得愈嚟愈Bias。