樂隊太極鼓手朱翰博（Ricky）日前承認與細他19年的戴夢夢撻着，表示已與結婚27年的新加坡籍、從事銀行高層的老婆Anne辦理離婚手續中，而他老婆堅稱「沒分居沒離婚」，並指他大話連篇，更有傳他食軟飯。

日前有報章拍到Ricky與夢夢上月底的拍拖生活，男方揸着波子載夢夢在大坑嘆日本菜，其間食到一半，二人行出食肆親熱纏綿，攬到實互咀脷叠脷。離開時二人似乎有劇烈爭執，夢夢更忽然多次剝低短裙，公然露底。之後又在車廂中纏綿半小時，更開車到附近的賓館，奈何客滿，二人無癮離開。

Kawaii：佢要現金落袋

本報昨日嘗試聯絡當事人，截稿前未有回覆，而夢夢的閨蜜Kawaii昨上now電視的《娛樂審死官》節目，問她夢夢是否被Ricky老婆掌摑，她表示不方便講，但她笑言夢夢一向愛得高調。問到Kawaii上次與夢夢飯局，有否見過Ricky，她爆料指：「在Ricky前，我見過佢三個男友，其中一個去到談婚論嫁，連禮金都傾過，當時女家要100萬禮金，男家打算以樓換現金，將層樓改畀夢夢名下，但佢要現金落袋。當男方諗緊辦法，女方出現偷食行為，被男方當場捉住，婚事就擱置。」
夢夢的前男友、堪輿師陳定幫昨在電話表示，指二人沒聯絡，但有留意她的新戀情。對於舊愛被拍到與人夫新歡Ricky拍拖，當街扯甩裙露底行為神化，問他以前見過夢夢有此舉嗎？他說：「佢以前唔會咁，好正常㗎喎！至於佢神化行為，可能飲醉咗酒啩。」
林建名昨晚睇林俊傑紅館演唱會，被問到契女戴夢夢被指是小三時，他說：「有睇新聞，私人事就算契女都唔方便問，會話吓佢，飲醉除裙唔係幾好。」被問到Ricky太太指二人未分居時，他說：「太太講嘢未必相信，我自己都經歷過，對你好就乜都得，想你死乜都夠膽死。」他表示未聯絡到夢夢亦未見過Ricky。
採訪：劉敏、盧妹
攝影：沈健程