年初加盟上海申花，成為全球最高人工球員嘅33歲前阿根廷國腳泰維斯，以往踢英超時都已經係麻煩友，而家老咗都係冇變。禮拜日申花教練普耶就辭職下台，由吳金貴接任，新教練就講明因為泰維斯同前國際米蘭中場古亞連都超重，所以兩人都唔會有得踢，而且吳教練就暗寸呢兩個貴價外援揸流灘：「球員上場如果唔出100%努力，係完全冇意義。」目前申花23輪中超後排尾五，成績同班費完全唔成正比。

球隊成績咁差，泰維斯表現都梗係差，佢上陣嘅13場中超，只得2個入球4次助攻，普通到不得了。大半年前泰維斯接近加盟申花嘅時間，內地傳媒話佢年薪去到2,000萬歐元，英國《每日郵報》更加話到泰仔周薪達72.2萬歐元，即年薪約3億港元，唔知係咪賺得太多肚滿腸肥。