自由黨喺最後一分鐘，終於榮獲曾慶紅接見，田少眉飛色舞。梗係啦，田少一手策動七七事變，玩殘阿董，本來都已經罪同叛國，點知咁快就享受到中央唔嬲、既往不咎嘅皇恩，田少呢一鋪豪賭，不止冇輸清，重有錢贏，嗰頭周梁入行政會議，又點會唔喜上眉梢呢。

高潮戲肉今天上映
中央一旦發嬲，都唔係咁易𠱁嘅。田少透露，今次得曾副主寵幸，大紅燈籠高高掛，中間係經過唔少人搭路，換言之，天時地利，機會重罕有過一對熊貓成功交配，重懷孕有喜㖭。生唔生得出，雖然下回分解，不過呢次唔知係共產黨玩殘自由黨，定係自由黨玩番共產黨咯。
講到玩政治，中央點都高章過田少周梁呢班細路。曾副主臨時召見，同場加映，不過唔安排影相，係中南海嘅一種政治語言。曾鈺成就得到同曾副主握手影相嘅高級待遇，始終都係親疏有別。
大家鬥親中保皇，自由黨又點鬥得過民建聯？其實真正嘅高潮戲肉，係今日由霍老率領嘅富豪團，一鋪大晒，直頭由胡總親自出馬。中央見富豪，先至最夠誠意，因為真係好想聽吓富豪嘅意見，亦最想呢批米飯班主用資金挺港。
不過，胡總同時見一大班老細，除咗寒暄吓天氣，交心都好難。因為冇人會敢當住大庭廣眾勁插阿董嘅。睇真張富豪名單，裏面唔係冇老董嘅「無間道」嘅。
若果胡總想聽富豪嘅真心說話，就要「騎騎騎」完一輪之後，安排其他時間，個別咁叫入密室，好似上次飛哥喺內蒙俾人大領導人警告唔好玩阿董玩得咁盡咁，一定要冇第三者在場，中央先至有真料收到。但係，胡總日理萬機，又點得閒招呼逐個照肺呢？

眨吓眼，成個禮拜，唔經唔覺，國家都宣召咗幾個代表團上去談心兼進行思想教育嘞。講到埋身嘅收穫，大贏家就梗係霍英東嗰個粒粒巨星嘅富豪團，可以親炙胡總，好似食出一鋪十三么咁勁啾。
第二就係民建聯曾鈺成咁都埋到曾副主身，得到曾副主同佢高調拉票，讚佢係自己友，一報7.1溫家寶喺遊艇上兜口兜面有眼不識係邊個之仇，有如自摸清一色食盡八番，派彩都唔少。

傳媒食雞胡也開心
自由黨嗰團，本來諗住摸和嘅嘞，點知最後自摸隻發財返嚟，加埋成手萬子索子，咁都食出鋪對對胡，有四番喎。
至cheap嘅，都係新聞傳媒嗰團嘞，中央只係出動主管宣傳嘅李長春出面招呼，重訓令成班傳媒高層要有理性，落番去要幫吓阿董，唔好成日鬧。呢手牌，五顏六色，只不過係雞胡唧，之但係睇見一啲新聞行家，幾十歲重爭櫈仔霸頭位影相，企到個靚位，由心底裏笑出嚟嘅幸福表情，佢哋始終係純品啲，打得生手，執少少，好似都開心到幾晚瞓唔着呀。


傳真︰2623-9278
電郵︰[email protected]