競選期間以至當選後，都對個別傳媒情有獨鍾嘅梁振英，噚日開咗個傳媒「大圍」吹風會，咁慷慨，事出有因，皆因要推銷佢個五司十四局新政治架構。

梁振英親自上陣解畫，把聲有啲沙沙哋，有記者好關心候任特首健康，問佢有乜毛病，梁振英話近日要不斷向唔同人士重覆講解新架勢，因此講到沙聲。不過咁都無辦法，因為佢唔肯做公眾諮詢，惟有自己加多幾錢肉緊去推銷。不過佢唔係孤獨嘅推銷員，因為候任特首辦主任羅范一樣咁落力，八方聽聞羅太為咗向各界推銷新架構，幾乎係隨傳隨到咁向各路人馬解釋，只要你得閒，又願意聽羅范解畫，佢願意全天候oncall咁話。