施明僅視李家鼎為兩子之父： 即係親人囉
蘋果日報 2020/09/17 09:53
施明李家鼎苑瓊丹
網上圖片
施明自從告別有線靈異節目《怪談》之後，幾乎絕跡幕前，偶爾演出舞台劇，對上一部作品已是2008年亞視劇《法網群英》，原來多年來都心癢癢想復出，她日前接受苑瓊丹（苑仔）主持的香港開電視《開工大吉77》節目訪問，分享愛情、家庭及工作等心路歷程，被問到會否和前夫李家鼎復合？施明無奈說：「答唔到。」
訪問前，施明坦言需要戴口罩拍攝，跟苑仔亦以碰手踭代替握手，防疫意識非常高，她解釋因為要幫手湊孫，須加倍小心，但因很久沒和苑仔見面，很開心受到邀請，亦都希望可以復出拍戲，最近戲癮大發作：「我好想拍戲，當年霑叔（黃霑）係我姨丈，佢話我讀乜鬼書，天生就係做戲，咁我咪叫佢介紹囉！佢一口拒絕話邊有自己人帶親戚入行，叫我考訓練班。不過讀緊訓練班時，有個導演睇中邀請我拍戲，所以一入行就拍電影。」
由於有舞蹈及功夫底子，入行即成為打女，亦因而與李家鼎結緣，她憶述：「當年拍戲都好無知、好百厭，唔識人情世故，有啲人蝦我，李家鼎出面幫我擺平件事。到底佢係睇中我先幫手，定係佢真係咁正義呢？要問番佢先知喇！但係好多人都話佢係好幫手，最終佢都幫咗我幾次。」之後二人婚姻出現問題，施明一度消失幕前，她道出真正因由：「因為當年兩個仔都拍戲，要搵個地方畀佢哋專心讀書，所以去咗美國5年，當年呢個決定真係好勇敢，而家諗番都好驚。」
為了愛兒讀書，施明放下身段重新出發，美國試鏡爭角色拍廣告、電影配音賺錢，加上鼎爺補貼維持生活。回憶昔日飄洋過海，人生路不熟，又沒親友接濟，就膽粗粗打電話向胡金銓導演求助：「其實我同佢都唔熟，當年佢話我個樣唔適合拍戲，所以冇合作過。但人生路不熟，惟有求吓人啦！之後佢話叫我住幾日酒店，因為佢要返台灣做身體檢查，返嚟介紹我開工。點知等咗成個月都冇聲氣，最終帶埋兩個仔出唐人街行吓，撞到另一個導演，見到華人真係好開心，佢話我知原來胡金銓死咗，我成個月都冇買報紙，乜都唔知。」
施明大讚前老爺廚藝了得，鼎爺盡得真傳：「佢煮嘢食同書法都好得，所以李家鼎都好叻。以前就我負責煮飯嘅，慢慢就變工人煮，所以都唔記得晒啲食譜，而佢就有朋友嚟先去廚房露兩手。」苑仔最後問到施明會否和鼎爺復合？她坦言：「我都唔知點答，有冇諗過都答唔到，至於佢有冇明示暗示，我唔知㗎！我份人糊糊塗塗咁，有時講到白都聽唔清楚㗎！我唔係詐癲扮傻，一向都係傻傻哋。佢係我前夫，再見做番朋友？我做唔到，但佢又係我嗰仔嘅爸爸，咁即係親人囉。」
施明希望復出拍劇。
施明和苑仔以碰手踭代替握手。
施明開心沒被遺忘，所以欣然答應苑瓊丹的訪問邀約。
李泳豪和姪兒、媽咪經常有家庭聚會。（IG圖片）
施明為了一對孖仔而繼續和李家鼎見面。（IG圖片）
施明坦言和前夫李家鼎不再是朋友，但可視之為親人。（IG圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！