算吧啦!巴神根本唔係一般人,你放大佢一個藐視嘅眼神,一下反守為攻嘅打人動作,又如何?男人嘅世界根本上充斥住唔少好似佢咁嘅鬼靈精。個個扮大佬扮認真,一個「大細路」係好重要嘅,一來有得笑,二來佢亦滿足咗好多大阿哥照顧細佬嘅慾望。
我中學時代嘅一位同學仔,就係咁嘅一位開心果,明明牛高馬大,偏偏細我成兩三年,人人好嚴肅嘅時候,佢就會搞笑;人人爭住認叻時,例如做甚麼學會搞手時,佢咩都唔玩,人人響體育堂着靚波鞋,佢就竟然着皮鞋踢波,但偏偏佢又會入到波又扭到你暈。總之佢做嘅一切,就係同世俗反其道而行,我哋表面成日話佢,其實心底都好愛呢位細路,因為佢將大家心底裏嘅童真繼續保存住,你有見過南華時代嘅百厭星山度士嗎?一模一樣!係山度士矮少少啫。