【失婚又如何】趙頌茹擔心年紀越大越冇選擇 仍然相信愛情想嘗試戀愛
蘋果日報 2019/12/26 22:00
趙頌茹Yu
有說感情合則來不合則去，說得輕鬆實行艱難。作為失婚的女人，外界難免貼上標籤，趙頌茹早前與兩位失婚素人參與ViuTV節目《一切從失婚開始》到訪日本，除了體驗當地文化，更互相分享失婚後的感受。趙頌茹說：「當時我經歷嘅問題，唔係一件醜事，一定可以跨過。」
趙頌茹日前在九龍灣受訪，甫坐下已經開籠雀般分享拍攝時的感受，她說：「好多人會擔心『崩口人忌崩口碗』，唔敢同我去講失婚，但係今次同行嗰兩位素人都係失婚，反而大家可以咩都傾。有一位已經拍緊拖，有時聽到佢哋有嗌交，我哋即刻話『一個人咪幾好。』哈。」
問她會否考慮與小鮮肉拍拖？趙頌茹笑謂：「我鍾意睇咋，邊個唔鍾意睇青春㗎？但係拍拖就...除非思想好成熟，而且對方都有屋企人，唔係兩個人嘅事。」她自爆最愛看韓國BTS，有次被細女問她喜歡自己還是BTS多，趙頌茹說：「我梗係話鍾意佢多啲啦，然後就同佢一齊睇，不過佢都冇興趣。」
談到再次投入戀愛，趙頌茹直言仍然相信愛情：「但唔係激情，去完今次覺得可以嘗試吓（戀愛）。因為自己一路閂咗門，有追求者但係唔啱，自己都奄尖咗。」問她是否見過鬼怕黑？趙頌茹即鬼馬說：「我唔怕黑，我怕鬼啫。其實以前都係自己標籤自己，可能係華人社會啦，外國真係一件好小事，其實係我哋太框架咋。」
她坦承擔心自己年紀越來越大，又擔心男人有得選擇，只會選擇未婚的女人：「其實我明白唔使咁諗，不過我又唔會主動去搵，遇到先算啦。」
拍攝團隊帶她們回到印象深刻的地點，兩位素人重返離婚時那間律師樓狂喊，趙頌茹說：「我已經過咗呢個階段，反而諗返嗰時，成日有人寫紙仔叫我加油、傳媒朋友又好錫住我，我好感動。因為我放低藝人身份，我都係一個人，人總會面對唔如意嘅事，當時我嘅家庭問題，唔係一件醜事。」
另外，講到前夫周永恒早前街頭跪警察，趙頌茹直言只會回應一句：「希望佢長大會知道，佢做任何嘢都會影響到細路仔，做父母最緊要就係身教。」
採訪：盧妹
攝影：林賓尼
攝影：林賓尼
（攝影：林賓尼）
趙頌茹早前與兩位失婚素人參與ViuTV節目《一切從失婚開始》到訪日本。
趙頌茹坦承擔心自己年紀越來越大，又擔心男人有得選擇，只會選擇未婚的女人。
談到再次投入戀愛，趙頌茹直言仍然相信愛情。
趙頌茹自爆最愛看韓國BTS。