而呢場「雙容會」，前晚喺立法會拉布後進行，容樂其同容海恩撐枱腳後喺fb形容呢餐飯同對方「坦誠深度交流咗成晚，真係好歡樂」，仲話自己已經好耐冇講咁多嘢畀人聽喇，大讚恩恩豬「真係好靚女~肯定係全部議員之中最靚女！」又自爆席間講咗好多秘密，似乎好鬼冧。
八方問過恩恩豬，佢話最近花多咗時間上網接觸巿民，由於容樂其經常喺網上出post介紹香港美食，兩人傾傾吓就約咗呢餐飯。對於容樂其讚佢靚女，恩恩豬即時笑開顏，並指席間所指嘅「秘密」，其實係容樂其分享咗一啲個人歷史，包括以前曾經加入社民連，自言：「我之前唔知（佢入過社民連）㗎，我係睇《文匯報》先知㗎。」恩恩豬仲話餐飯最大驚喜，係發現大家大學時都曾修讀德文，席間佢示範講咗幾句後，容樂其都讚佢「講得幾準、幾正喎！」佢又話同容樂其同姓，都係席間一個話題，實則容樂其鄉下喺番禺，容海恩則係新會人，所以兩人應該冇乜親戚關係，只係咁啱大家都姓容喎。
李八方