由《壹號皇庭》金牌監製鄧特希親自操刀嘅劇集《法網群英》，下星期一喺亞視本港台播出，呢套涉及法律情節嘅劇未出街，幕後鬥「法」可能仲精采；被拖欠薪金嘅製作人員搵公民黨大狀幫手追數，如果唔找數，分分鐘申請禁制令阻止套劇播出。

知法犯法好諷刺

公民黨陳淑莊噚日同八方講，有製作人員向佢投訴，指鄧特希開出的支票彈票，多位工作人員及演員至今未出糧，估計涉及金額最少幾十萬元，「鄧特希拍咁多法庭戲，卻知法犯法，好諷刺」。佢透露曾考慮申請禁制令阻止新劇播出，但因時間緊迫未必成事，惟有循其他法律途徑追討。
演員之一林雪亦未收尾數約10萬元，首次同鄧特希合作就被拖數，林雪表現無奈，佢話曾多次聯絡鄧特希，但一直冇回覆。「佢搵我拍劇時好有誠意，叫我幫幫手，原來咁無賴！」佢又話已打定輸數收唔到錢，只係戥其他工作人員唔抵，「呢個人都唔知點搞嘅，可能有人真係等嗰一萬幾千開飯，咁樣拖數，好冇陰功」。