巴黎聖日耳門（PSG）周六炒雷恩4:1場法甲，竟有兩位球迷扮成忍者龜衝入球場，同PSG班球員一齊慶祝。點解要扮忍者龜？咁就多得「新亨利」基利安麥巴比！

事緣麥巴比今季入「門」後，班新隊友就笑話佢個樣好似忍者龜，仲幫佢起咗「Donatello」呢個花名，即係4隻龜中戴住紫色眼罩嗰隻，而隊長堤亞高施華亦同幾位隊友，早前夾份喺更衣室送個忍者龜面罩畀佢；所以今次呢兩位衝入場嘅球迷，就扮成忍者龜向呢位18歲新星致敬，仲同佢攬攬。

不過，最玩得嘅反而係右閘丹尼爾。呢位巴西人，仲扮晒喺背後拎武器出嚟同兩人抽過。雖然場面真係好歡樂，但最尾呢兩位「入侵者」當然都係畀保安乖乖捉住離場，但兩位大細路走時仲係咁向在場球迷揮手。