將於今日正式喺香港上映嘅韓片《逆權司機》改編自真人真事，以1980年光州事件做藍本，電影上月喺韓國公映後贏盡票房及口碑，成為今年最快突破千萬人次入場嘅電影，就連現任總統文在寅都有捧場，佢更強調會再次徹查當年嘅事件，上周國防部落實成立九人特別調查團，展開為期三個月嘅調查。

《逆權司機》除咗影響勁到政府重新調查事件真相外，光州市政府更與「5.18」基金會合作，喺光州市廳進行一個《逆權司機》嘅特別展覽，用以悼念當年揭露真相嘅德國記者Jürgen Hinzpeter。展覽會由上月21號起至本月3號結束，展覽會除咗特別擺放《逆權司機》中宋康昊駕駛嘅的士、《逆權司機》嘅劇照及花絮照外，仲有當年Jürgen Hinzpeter拍攝所得嘅相、影片，而其遺孀亦為咗是次展覽，特別提供Jürgen Hinzpeter嘅眼鏡、護照等物品。