電子支付在港推行得如火如荼，除了光顧商戶可應用電子支付外，最近陸續有街市及的士支援支付寶的服務。90後的Alva在15年加入Yedpay，負責為商戶提供不同的電子支付方案及技術，他認為電子支付能方便不同階層的市民，於是大力推動在街市及的士支援電子支付服務，除了令電子支付更普及外，亦成功令公司業務得以提升。

採訪當日，Alva帶記者坐的士到秀茂坪的寶達街市買菜，全程也是用支付寶交易，「最近我哋與街市及的士司機合作，為佢哋編寫program，以QR Code技術令佢哋嘅業務支援到支付寶服務。現時寶達邨、大窩口邨、長亨邨等街市可以用到，另外全港約有2千多部的士用到支付寶服務。整體使用率都幾好，安裝咗嘅街市檔口每日都有人用緊，魚檔及菜檔嘅使用率就高啲，而的士就每日有6、7成嘅使用率，算唔錯。」

Yedpay是一間提供電子付款平台技術支援的公司，與Yedpay合作的機構包括Mrs. Fields Cookies、盞記、HMV、Ermenegildo Zegna等。今年24歲的Alva現擔任Yedpay的資訊安全總監，「我哋有電子支付終端系統支援服務、開發與電子零售有關嘅軟件等。除咗IT部外，我仲會負責管理marketing及sales嘅部分，見客、統籌、寫program等，都幾多嘢要顧及。」

老細畀機會
年紀輕輕便身居要職，不是因為Alva有甚麼深厚背景，只是他在Yedpay的工作資歷不短及表現出色，雖然他於17年才在理工大學畢業，但在畢業前他已加入Yedpay工作。「我係讀資訊安全嘅高級文憑，15年畢業後，我見自己嘅成績唔係特別標青，對升大學冇乜信心，就打算搵份工，當時見到Yedpay請人，就去應徵資訊安全主任。當時公司幫Master Card整緊有關mobile pay嘅project，需要拎到安全認證，咁啱呢方面係我嘅強項，老細肯畀機會我試。」

工作後不久，Alva便收到大學取錄通知，但上司見到Alva能力不錯，便讓他邊讀書邊工作，「當時公司要拎PCI DSS Level 1最高級別認證，唔容易拎到，當中要顧及防火牆嘅設定、硬件嘅要求及系統嘅簡化等，我寫好晒proposal向上司present，上司見我有板有眼，都願意畀我去整。雖然之後要讀書，我就用課餘時間工作，dayoff就返公司，前後與同事一齊合作咗半年時間，終於搞掂咗個認證。」

升做資訊安全總監
16年，Yeday成為支付寶在香港3個代理的其中之一，Alva便開始接手這個計劃，「公司唔算大型，人手唔多，當時推廣、後勤及前線工作都要做，好似搵商戶傾合作、寫proposal及安裝等都係我負責。」17年大學畢業後，Alva便獲上司晉升為資訊安全總監，開始管理公司不同的業務。

除了品牌外，Alva覺得電子支付可以更貼近民生使用，於是向街市及的士司機推廣支付寶服務，「現有唔少大型連鎖店都已經支援支付寶，反而個體散戶流通度唔夠。其實電子支付方便到需要大量找續嘅生意，我就決定嘗試同街市及交通工具合作。」

簡化介面方便使用
要在基層普及化電子支付，Alva認為要用時間，「我哋先搵寶達街市嘅管理公司傾，前後用咗個幾月先落實，最大嘅擔心係攤販唔識用。喺落實之後我與同事要去街市逐檔教佢哋用，使用界面要盡量簡化，只要記登入帳號及密碼，仲可依檔主嘅要求改動，好似唔用月結，改用日結形式顯示生意額，符合佢哋嘅習慣。另外，有客服支援，唔記得點用可以打上嚟問。喺交通工具上，我哋先向的士司機入手，的士司機就要逐個去傾，花好多時間，中間會有啲司機唔接受，但大部分司機都願意去試。」

隨着業務擴展，Alva現時管理着公司內二十多位同事，他表示已有不同的發展計劃，「會繼續將電子支付服務向更多的士司機及街市推廣，另外亦計劃與其他界別合作，例如中港直通巴士及小巴等。我哋仲有同大學合作研發AR及區塊鏈，打算應用喺電子支付上，希望諗出嚟嘅嘢，可以方便到人。」

搵好工，即上 http://www.ecjobs.com.hk