三十七歲躉船工人黃潤光，早前墮海失蹤，近日屍體終被發現。黃家上下對阿光的死，悲痛不已，並希望盡快讓他入土為安。可是，年來迭遭不幸的黃家，家境清貧，無力應付突如其來的殮葬開支，蘋果基金即時施予援手。

「聽阿哥啲同事講，佢嗰日係因為唔小心跌咗份文件落海，所以想落去執番，點知海面風浪太大，阿哥好快就被大浪捲走咗，佢啲同事都有落海企圖救佢，但都唔成功。」死者的胞弟錦慶說。
單身未婚的黃潤光，在五兄弟妹中排行第二，與父母同住，任職躉船工人，負責貨櫃掛鈎的工作。阿光本身是水上人，自幼與海為伴，想不到最後亦葬身大海。
出事後，阿光一度失蹤八天，直至日前，其屍體始被水警發現在大嶼山竹篙灣海面漂浮，經過家人認屍，證實其身份。

雙親打擊至大
錦慶表示：「正所謂『行船跑馬三分險』，其實阿哥都有諗過轉行，不過佢冇學歷，讀書只係讀到中二，𠵱家經濟環境又唔好，佢先一路拖住先，估唔到真係出事。」
阿光猝死，他的雙親打擊至大，終日茶飯不思，以淚洗面。為免老人家再受刺激，喪事交由阿光的兄嫂及弟弟處理。
「阿光出名好仔、孝順，今次佢死得真係好唔抵，不過，𠵱家都唔係追究責任嘅時候，最緊要盡快搞好佢嘅身後事，等佢安安樂樂。」阿光的大嫂一臉傷感地說。