調查顯示，由05年起，美國航空業接獲嘅投訴持續增加。美國空運協會發言人卡斯特爾維特話，航空業現時服務水平「不容樂觀」，將來可能會有更多航班延誤、取消、遺失行李等事件。
jenniferjuniper80喺《MSNBC討論區》呻：「部份經濟客位太細，令人坐得唔舒服，嗰啲健康欠佳嘅乘客，仲會因為長時間無得郁，患上經濟客位綜合症候群，出現致命嘅血栓塞症。」
1drwmn批評：「部份航空公司職員服務態度差，但都好難怪佢哋，美國啲航空公司近年瀕臨破產，員工被迫大幅減薪，唔少職員惟有打兩份工搵多啲錢，搞到冇精神，服務態度自然差。」
labratt講：「我有次搭飛機遇上超額訂票（overbooking），航空公司話我冇提早45分鐘checkin，於是將我個位讓畀人，搞到我上唔到機。」Delays就不滿航班延誤，話試過遲成兩個幾鐘頭先起飛。

買架飛機唔使受氣

philhamblett晒命話：「我好怕喺機場等上機，所以買咗架小型客機，鍾意飛去邊都得。如果飛行路程唔係太遠，我寧願自己揸車，好過幫襯航空公司。」
據統計，「歐洲航空協會」24家會員航空公司舊年一共遺失560萬件行李，平均每1000名乘客就遺失15.7件。
今年頭兩個月，美國航空業發出嘅道歉信按年增加1倍。美國西南航空更誇張，新近成立咗一個專門向乘客道歉嘅部門，仲設立「首席道歉官」一職。