【傳緋聞又如何】陳瀅公然投票畀陳家樂:真係做得好好
陳瀅陳家樂
陳瀅今日去到將軍澳出席義工活動,佢話自從喺劇集飾演救護員後,特別覺得幫到人好開心,所以希望一有機會就做多啲類似嘅義工活動。講到台慶頒獎禮有份提名女配角嘅佢表示對攞獎冇信心,淨係希望有份主演嘅劇集有獎,包括男主角馬德鐘。至於最愛歡迎電視男角色方面,佢直言已投票畀陳家樂,你哋傳緊緋聞喎,咁公然投畀家樂?陳瀅話:「唔關事,佢喺劇集度真係做得好好。」
陳瀅又透露當晚戰衣仲未準備好,佢直言都有少少緊張,上次台慶俾網民笑佢件衫似茄子,今次又會似咩蔬果?陳瀅笑言:「或者着黃色似香蕉,紅色似蕃茄都得。」
嚟緊聖誕陳瀅要同洪永城拍劇度過,啱啱先有報道指洪永城撻着新歡,陳瀅反問:「係咩,佢認咗喇?」莫非你一早知?陳瀅笑話:「洪永城未答我唔會答任何嘢。」會唔會恭喜洪永城?佢話:「等我見到面問吓先,佢認咗我先會恭喜。」
精選娛聞,喺晒《娛果》
http://fb.com/appledailyent