(新增影片)韓君婷事業運暢順，由亞視過檔去大台發展，得到好多拍攝機會，但佢嘅情路就相反，而病逝嘅初戀髮型師男友，依然令佢難忘。

「我諗韓君婷嘅感情路上，第一個初戀之後，一路都係向下滑。」呢個係佢對自己感情路嘅總結。

韓君婷同初戀髮型師男友葉錦昌（Sherman）98年拍拖，未幾Sherman發現患上肝癌，當年經常陪伴男友出入醫院，不離不棄。韓君婷亦曾透露，Sherman有向佢求婚，可惜天意弄人，Sherman 99年過世，最終要天人永隔。

從此情路變得崎嶇，韓君婷隨後多次捲入第三者緋聞，先有指當年介入伍士榮及周海媚戀情，後又有指佢與九巴後人雷兆光堂弟雷冠賢互生情愫，更被雷太高菲菲指：「唔好再騷擾我老公。」但遺憾地，當時韓君婷被問到幾時會搵白馬王子？韓君婷傷心話：「我嘅白馬王子已經死咗嘞。」

喺韓君婷情史上，仲有一位同性密友：陳欣健長女陳早茵。兩人先後被影到在車廂激吻，又被影到出入對方寓所，其後兩人一度同居。不過，呢段戀情喺06結束，韓君婷亦一度暴瘦至體重只剩88磅。

對於呢段感情，韓君婷話：「同性戀喺2017年，或者2010年嘅時候，都唔係一件好誇大嘅一件事囉。咁我試過，但我決定咗我唔係我想要嘅嘢。」

戀情於今日嘅韓君婷而言，佢話：「咁我覺得無為向呢一個咁難嘅路挑戰囉，係咪先。感情係計唔到嘅嘢，但係工作我係計到嘅嘢嚟，因為我呢度計到我會有咩回報。」