當年今日
關於我們

【韓流】崔智友3月閃婚 日媒驚爆老公曾係紅牌牛郎

蘋果日報 2018/07/29 12:46

崔智友崔智友老公

現年43歲嘅韓劇《天國的階梯》女星崔智友今年3月突然宣佈結婚,所以外界都相當好奇友姐老公嘅身份,韓媒《Dispatch》本月曾公開更多友姐老公嘅資料,指男方姓李,1984年出世,跟友姐相差9歲,兩人至少認識三年,報道又指友姐曾於2014年協助老公創業,所以其老公依家係手機應用程式嘅公司老闆,而男方更於翌年為友姐改名。
不過今日日媒《東京體育報》就爆料指友姐老公曾做過牛郎,引起關注。據日媒引用韓國時尚圈人士講法,友姐老公曾係首爾江南區好出名嘅紅牌牛郎,有傳友姐對老公一見鍾情並十分迷戀對方,但估唔到雙方會結婚,甚至有指業內人士都知男方曾做牛郎呢件事。報道續引述相關人士透露,因韓國社會十分重視家世、學歷,所以友姐為咗隱瞞老公嘅過去,就花咗唔少錢幫老公成立公司。
報道曝光後。有唔少日本網民為友姐護航,留言表示:「當事人覺得幸福嘅話,來歷背景都唔係咁重要」、「就算老公係前牛郎,我都唔會討厭佢」。

精選韓流,喺晒《娛果》
http://fb.com/appledailyent