武漢肺炎︱西貢人頭湧湧的士站排長龍 大專生野餐過聖誕：相信政府就「無事」
蘋果日報 2020/12/25 18:09
武漢肺炎西貢露營
聖誕佳節遇上武漢肺炎肆虐，不少人選擇到郊外遊玩。西貢今午雖未算「逼爆」，但都人頭湧湧，帶同大背囊乘的士去郊外的市民一度排長龍。有前往露營的市民說，兩日一夜露營當去旅行；亦有父親帶同幼子行山，強調會做足防護措施，今晚會回家食飯，「最緊要一齊開開心心」。
西貢碼頭中午有不少市民遊覽，有前往附近小島的街渡滿座，的士站不時出現蛇餅，大多等候的士的市民都背上大背包和手持保溫箱，相信是去露營。雖然限聚令維持二人，惟現場所見，不少人成群結隊遊玩，但都有戴上口罩。附近海鮮餐廳的戶外座位，午市近乎滿座，亦有西餐廳要排隊入座。
海鮮餐廳的戶外座位，午市期間近乎滿座。本報記者攝
的士站不時出現蛇餅，大多等候的士的市民都背上大背包和手持保溫箱，相信是去露營。本報記者攝
梁小姐說，過去12月都會去旅行，或與大班人開派對慶祝，今次是首次在聖誕節去露營。本報記者攝
帶同大背囊去兩日一夜露營的梁小姐說，過去12月都會去旅行，或與大班人開派對慶祝，今次是首次在聖誕節去露營，「懶係有旅行氣氛咁」，但今晚不會特別慶祝。她指，平日除上班就是在家避疫多天，「好耐無吸過新鮮空氣」，又指今年聖誕節「無乜氣氛」，「出到去好多地方無得食飯同聖誕大餐，就算擺晒聖誕裝飾都係得嗰啲位多人，其他位都無乜聖誕氣氛」。她又說，平日市區已人多密集，疫情「無得擔心」，惟有多消毒和洗手。
胡同學則與數名朋友到西貢碼頭，打算乘船到小島野餐過聖誕，「市區都無咩可以做，乜都封晒，6點後又無堂食，所以不如出去呼吸新鮮空氣」。本報記者攝
「今年好有氣氛，未見過條街咁少人」
大專生胡同學則與數名朋友到西貢碼頭，打算乘船到小島野餐過聖誕，「市區都無咩可以做，乜都封晒，6點後又無堂食，所以不如出去呼吸新鮮空氣」，又說自己多上網上課堂，已在家「吽咗好耐」，「6點前都有嘢做，6點後都喺屋企」。他指，過往聖誕節可能會和家人去旅行，「今年『好有氣氛』，未見過條街咁少人，尖沙嘴就『精彩』，冷冷清清咁」。他說，疫情第一波時曾感擔心，「一耐咗就無事，相信政府就『無事』」。
葉先生則帶同兩名幼子去西貢大枕蓋行山，「就係相對地少（人），佢哋已經喺屋企好多日，就同佢哋出去行下，行山比市區相對地安全」，會做足「安全措施」。他說，今年聖誕氣氛較平淡是可以理解，今晚也不會特別慶祝，「都係一家人喺屋企食餐飯，會有禮物畀佢哋咁，最緊要一齊開開心心」。
適逢聖誕節，有市民着上聖誕老人服裝增添氣氛。本報記者攝
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！