國家領導人霍英東個孫霍啟中,日前因涉嫌藏毒被捕。啟中老竇霍震寰,噚日喺中總會員大會蒲頭,佢就唔認係因為自己管教不嚴,重同個仔開脫,話因為佢俾外國嘅風氣影響,「喺外國都唔覺得係好重要嘅事,可能佢唔係好知道。」
霍震寰又話,已經盡量教啟中,但佢社會事務纏身,唔可能成日教個仔,暫時未聽到有關起訴啟中嘅消息,希望唔好影響佢開學。
「畀佢做一屆囉」
喺同一場合八方又撞到蔣麗芸。佢個妹Lily蔣麗莉早排想同自由黨林健鋒爭選立法會,但最後就俾自由黨夾硬勸退,傳聞為咗要Lily唔選,田少重答應下屆支持佢做香港總商會主席。
其實如有此事,Lily應向胡官投訴啦!選舉條例唔容許威迫利誘唔准人參選立法會。但芸姐話:「我哋蔣氏姊妹唔會咁易俾人影響。」佢重寸林健鋒話:「林健鋒年紀大(五十多歲),就畀佢做一屆囉,下一屆都做就要去直選。Lily四十二歲咁年輕,唔使咁快做會長,等佢六十歲做都唔遲啦!」
蔣麗芸(圖)個妹妹本來同林健鋒爭選立會商界議席。
傳真︰2623-9278
電郵︰[email protected]