【私竇做炮房】細So被爆背妻偷食後首現身：我係一個犯錯咗嘅人
蘋果日報 2020/09/02 15:38
細So陳頴楠蘇耀宗
商台前DJ蘇耀宗（細So）驚爆背妻偷食KOL「白滑阿B」，在葵涌租私竇做炮房幽會，孽緣糾纏至今年6月才玩完；阿B好友向《蘋果》爆大鑊，公開細So的偷食證據，撕破他的好好先生假面具。好男人形象破產的細So昨晚接受《蘋果》訪問時，為偷食事件連講7次「對唔住」，公開向太太道歉。
事件曝光後，即成為城中熱話，不少網民化身「神探」找尋「阿Ｂ」真實身份，而男主角細So亦於今日下午約1時現身貝澳寓所外，大方回應在場傳媒提問。身穿淺藍色T恤牛仔褲的細So表示，自己剛在外完成工作，知道有大批傳媒在家門守候，所以特地趕到希望正面回應，並向記者謂「山長水遠，辛苦大家要等咁耐。」
偷食事件後首次現身的細So，已準備好一番說話向大家交代，「我同老婆協商咗，亦都傾過。我哋噚晚喺各自嘅平台都做咗啲回應，都覺得應該要向大家（記者）面對面交代一聲。好似我個回應一樣，我承認我做錯咗，無論係我個人做錯咗，我嘅感情事，都做錯咗，我對唔住我太太、家人、關心我信任我嘅朋友、客戶、仲有第三方（阿B），我好誠懇咁講一句，對唔住。」
細So續說：「我冇得請求大家去原諒，當然亦冇得請求太太原諒我，我將呢個決定交畀大家亦都交畀佢，但係我喺兩個月前將成件事講畀我太太知道後，佢選擇咗畀一個機會我，佢原諒我，都不特止，佢知道跟住落嚟對我哋嘅婚姻、我哋嘅家庭都會面對好大困難，但係佢願意同我一齊去面對，去愛護我保護我。我，好對佢唔住。」
細So又表示：「我好坦誠咁同佢講咗我究竟犯咗咩錯，我亦都承諾咗我之後可以做啲乜嘢，佢畀個機會我做返一個負責任嘅爸爸、丈夫，我都好希望可以用行動去表現呢件事，所以喺佢知道呢件事之後嗰兩個月，我都花我嘅力氣，去盡我責任去做返一個爸爸同丈夫。」
細So強調希望家庭安好，「其實喺噚日呢件事公諸於世時，我哋又面對多咗壓力，所以我哋有需要向公眾交代，報道嘅傳媒有問返我，所以我出咗個回應，其實仲有啲回應係未出，所以陸陸續續有更加多嘅新聞或者留言都好，我好希望大家可以畀一啲空間我，畀一啲空間我屋企人、我太太、我嘅小朋友。唉...好真咁講一句，到底咩人唔想重提往事？就係犯錯嘅人，我承認我係一個犯錯咗嘅人，感情係，自己都係。對唔住咁多位，要大家擔心，仲能唔能夠接受我，我將呢個選擇交返畀大家。」
問及細So老婆目前的情況，細So表示：「要做嘅回應，大部份我哋都做咗，如果我再重提（偷食），可能對每一方都唔係咁好，會畀到更多壓力同傷害，我造成嘅傷害已經好深，唔想再傷害到佢（太太），佢選擇咗大家繼續行，所以尋日佢知道報道時係有壓力，但係由於佢心入面已經決定咗，所以其實佢係擔心我，擔心我要出嚟面對大家，去解決呢件事。佢的確係一位好好嘅太太、好好嘅媽媽，佢比我更加顧家。」
對於網民化身神探搜尋「阿B」真身一事，細So表示自己已得知情況，並道：「我知道好多人會被牽涉其中，好多人會被人話『係咪佢...係咪佢...』，我先講一句，真係好抱歉好對唔住，我冇方法可以幫你哋一一澄清，我更加唔想呢件事再發生更多嘢傷害更多嘅人。我有望可以做返一個盡責嘅爸爸同丈夫，我唔夠膽講我可以成為一個好男人，每一個人犯錯後都希望得到一個改過嘅機會，我太太畀咗一個咁好嘅機會我，我要好好珍惜。」
至於工作方面，細So表示昨日及今日都忙於向客戶交代，並再次向受影響的人士致歉，至於事件可有影響工作？細So自嘲：「本身我工作都暫停晒。」
男主角細So亦於今日下午約1時現身貝澳寓所外，大方回應在場傳媒提問。（蘋果日報圖片）
細So表示昨日及今日都忙於向客戶交代，並再次向受影響的人士致歉。（蘋果日報圖片）
細So受訪時，多次雙手合十。（蘋果日報圖片）
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！