黃智賢在中環開設《LA PURO醫學皮膚中心》，今日在中環舉行開幕剪綵儀式，獲圈中好友包括歐陽震華（Bobby）、關詠荷、 陳松伶、譚玉瑛、黎芷珊、 麥長青、 張慧儀、陳慧珊、張錦程等等支持。

活動上見到番幾套劇集嘅經典組合，好似《陀槍師姐》嘅歐陽震華、關詠荷同滕麗名，真係難得一見；另一組兒童節目主持譚玉瑛姐姐、陳伀伶、麥包、黃智賢都好經典。歐陽震華就自爆：「我以前都係interview兒童組，仲同周星馳一齊，後來被foul咗。」至於張慧儀同黃智賢，就令人諗起《真情》。

Bobby同關詠荷一齊受訪時話，幾年前大家見過面，Bobby話：「前年上咗佢屋企拜年，佢著住件睡袍神褸，依家好興嘅神褸一號，唔係神州一號。認真諗過開《陀槍師姐》續集，再唔開驚人哋認唔到我。」之後Bobby仲稱贊黃智賢凍齡，由《真情》到o依家仲後生咗，關詠荷笑Bobby都ok，Bobby就話：「你哋唔見我一輪就去咗微調，調肥啲好睇啲，早前朋友介紹咗我睇一個中醫針灸瘦咗，啲人好擔心， 咁我咪調肥啲囉。」

關詠荷話遇到好劇本都會復出拍劇，Bobby見關詠荷一頭金髮，仲話對方似鬼妹，關詠荷就話︰「你都成個黑人咁，不過佢哋話如果要速成今次續集，要搵到以前監製鄺業生同埋編審。」兩人表示o依家拍文武戲，都可以親身上陣，關詠荷仲話有啲戲可以特技搞掂。但Bobby就好認真話：「咩特技呀？打得唔一定要有腹肌。」關詠荷話續集開，可以考慮一啲太空超能力元素，Bobby笑話：「你話得咪得囉，陀槍師姐，你係師姐你話事啦。」

講到當年係咪真係同周星馳一齊入兒童組面試，Bobby話：「當時拍緊《北斗雙雄》，自己做反叛青年，周星馳同其他人係我手下，後來或大家都要去面試430穿梭機，我好想入呢一個組，點知唔想入嗰個周星馳就揀咗，我就冇揀到。當時好想入兒童組，梁朝偉、周星馳、張家輝個個入咗去都好紅，佢哋入咗去做半年，出返嚟扣埋啲假，三個月就搞掂。」關詠荷仲笑Bobby一定唔得啦，唔可以早起。

精選娛聞，喺晒《娛果》
http://fb.com/appledailyent