「光纖之父」高錕同太太黃美芸返咗香港幾日，活動一個接一個，不過高教授一直都未有正正式式在鏡頭前展露風采，噚日中大為高錕像舉行揭幕儀式，高教授終於現身公開活動，八方同行家都好合作，冇開閃光燈以免閃到高錕。

銅像高過真人少少

現場所見高錕精神好好，紅光滿臉加埋執大白鬚不知幾搶眼，又成日同高太咬耳仔，唔少中大教授同佢打招呼，佢一時揮手，一時又豎起拇指，望落去鬼咁精靈。不過後尾人人排隊同佢影相時，高錕雖然都仲係笑笑口，不過就開始顯得有啲疲態，要勞煩校長沈祖堯幫高錕夫婦開路，同中大成班高層去咗沙田馬會食飯。
豎立中大何善衡工程學大樓平台個銅像高2.2米，重400公斤，如果唔計地台，銅像高過真人少少。塑像係由之前為楊振寧同李卓敏雕過像嘅中國雕塑院院長吳為山所作，佢話自己05年在李卓敏像揭幕禮見過高錕一面，之後有人邀請佢雕像，佢就憑一幅相加上當年記憶，整出呢個單手插褲袋嘅型仔像出嚟，佢話高教授時時都春風滿臉，真係高生來了，春天就來了喎。