要數當今中國女排第一人，非主攻手朱婷莫屬啦，23歲嘅佢過去一季征戰土超華基夫銀行，就以強勁扣殺俘虜球迷心，並贏得女排歐聯同世冠盃兩項國際大賽殊榮，唯一遺憾就係土超只得第3名。不過，朱婷有機會修補遺憾啦，因為華基夫銀行周四宣佈，正式同朱婷續約啦，據報年薪更會由110萬歐元升至135萬歐元（約1,176萬港元），成為全球最高薪酬女排球員！

朱婷亦透過社交網站以中英雙語向球迷分享好消息，雖然佢早前代表河南女排出戰全運會預賽時搏到出現高原反應，但目前已經康復得七七八八，仲表示：「我嘅身體恢復得差唔多，呢兩日正在享受假期，下周就要返國家隊啦。」中國女排正密切備戰一系列世界女排大獎賽賽站，包括下月21至23日出戰香港站。