當年今日

一周三件:航天食正潮流 - 錢雋

蘋果日報 2015/09/30 00:00


中國航天科技集團有12間上市公司,係市場煲佢有機會重組,而航天控股(031),PB系內最低,加埋航天同中國郵政合作,搞物聯網跨境電子商貿物流瓣數,食住大潮流大topic,有得諗。
航天得0.56倍PB,同系統兼香港上市,亞太衞星(1045)1.44倍PB、航天萬源(1185)1.2倍。其餘祖國上市同系,最低PB嘅都講緊2.8倍,航天PB,系內至抵。而集團由6月高位2.38元,到家陣累跌58%,得31億元市值,好細奀。
搶網購電貿肥肉
成個picture係,國、央企重組改革開波,市場中人估,其中一條路係理順同系上市公司業務架構。家陣航天系上市公司咁大堆頭,市場憧憬重組,唔係無道理。又航天主打包括線路板、液晶體顯示器等科技工業,同物業投資兩瓣,若果成功理順,航天亦多個chance面。
航天旗下航天數聯信息,除咗開展潛力勁厚嘅物聯網應用,呢期又同中國郵政合作,搞物聯網跨境電子商貿物流相關進出口項目。家陣網購電貿已經係大勢,有估計,去到明年,祖國跨境電貿市場規模,會上到7.8萬億港元。
睇到係,航天捉到大潮流,兼拍住中國郵政呢個超級巨頭。呢瓣一發到圍,唔單止支持到航天盈利增長,家陣場內有知名度嘅商貿物流瓣數,兩三倍PB閒閒,航天呢瓣,日後若果分拆釋放價值,係可以好肥仔。
睇實一年橫行底0.88元兜航天,博資金輪流炒重組concept,升40%上番250日線1.24元,航天先得0.7倍PB,仲未上到十年平均0.93倍水位。

錢雋
細價股專家
本欄逢周一、三、五刊出