「韓國十月文化節」嘅重頭節目之一「韓國電影館」，今年由韓片《亂世詩情》成為開幕電影，而《亂世詩情》嘅編劇申淵植及主演朴正民亦受邀現身PopCorn擔任開幕嘉賓，並主持開幕儀式。

活動原定7點半開始，但因交通擠塞嘉賓未能如時到場，延遲到8點15分先開始，申淵植編劇同朴正民簽名留念後就進行訪問環節。被問到電影同姜河那合作，朴正民表示：「同姜河那本身就係朋友，所以能夠合作好開心，姜河那係一個好好嘅演員。」朴正民直言片中飾演嘅角色係一個實際歷史人物（宋夢奎），所以好大壓力，驚自己演得唔好，影響到其家人。

雖然人氣韓片《屍殺列車》喺香港有好高票房，不過朴正民就話唔會擔心《亂世詩情》嘅票房：「因為兩者嘅規模、投資額都唔一樣，而且《亂世詩情》係想傳遞一個正面嘅思想畀觀眾，所以冇負擔，不過如果電影喺香港都受歡迎嘅話當然會好開心。」

被問到有冇睇姜河那有份演嘅韓版《步步驚心》，朴正民就表示自己都有追劇，咁如果自己有份演會想做邊個王子？朴正民話：「個人嚟講會想做四王子。」不過及後就話因為同姜河那係朋友，所以會支持八王子。

朴正民又表示：「今次係第二次訪港，第一次來港去咗赤柱，印象好深刻，今次有機會嘅話會想去蘭桂坊飲酒，同埋想試下點心。」之後朴正民同申淵植編劇就與眾主禮嘉賓完成剪綵儀式。