由韓劇《秘密花園》男星玄彬孖韓劇《Doctors》女星朴信惠主演嘅tvN新劇《阿爾罕布拉宮的回憶》，上周六首播，噚日播出第三集，Netflix亦將於同日起全球播映，每周上架最新兩集。

噚日一集講到玄彬成功同朴信惠簽約買下佢間旅館，實質玄彬係因為知道朴信惠係燦烈嘅監護人，而玄彬又好想買下燦烈嘅AR遊戲，所以先花錢買下旅館。而玄彬喺西班牙格拉納達繼續沉醉玩AR遊戲，仲見到遊戲內化身做「愛瑪」嘅朴信惠，朴信惠喺遊戲內好神秘咁，又披住紅色頭紗，低頭彈結他，同平日形象好唔同。

玄彬得知自己勝券在握，於是就同死敵朴勳喺當地玩AR遊戲決一死戰，最終玄彬順利贏咗，喺遊戲中殺死咗朴勳，但返回到韓國後，玄彬竟然收到朴勳去世嘅消息，令玄彬大感愕然，唔通遊戲嘅場景最終會成真？下集會講玄彬再次返回格拉納達了解死敵之死，同時亦要協助調查。

而噚晚一集嘅《阿爾罕布拉宮的回憶》收視繼續跌，跌至6.95%，最高收視率有8.0%。雖然收視跌，但仍然成為收費台同時段收視第一名。

精選韓流，喺晒《娛果》
http://fb.com/appledailyent