韓國樂壇盛事《KBS歌謠大戰》噚晚於首爾舉行，由男團EXO成員燦烈、防彈少年團(BTS)成員Jin及女團TWICE成員多賢擔任主持人，今次參與歌手多達30個組別，有成百人齊集喺台上，場面十分墟冚。

三大男團EXO、防彈少年團（BTS）同Wanna One，以及女團TWICE都有精彩表演，當中TWICE與其他女團成員合作演繹Miss A嘅《Hush》時，剛剛喺美國電影網站TC Candler中勇奪百大美女亞軍嘅TWICE 19歲台灣成員周子瑜，佢噚晚就罕有地穿上性感吊帶舞衣示人，微微露事業線，子瑜難得性感，即時令「子瑜太撩了」登上微博熱搜。

而TWICE成員Mina日前聖誕節因健康關係缺席活動，噚日佢孖隊友齊齊表演。但有粉絲就目擊佢臉色不佳，睇起嚟手軟腳軟，令粉絲大感心痛。

限定男團Wanna One將於今個月底解散，噚日佢哋都有精采表演，11位成員父母嘅錄影片段都分別播出，當中父母都為佢哋嘅囝囝打氣，成員朴志訓、河成雲、李大輝及尹智聖都因為見到父母片段而感觸落淚。

另外，壓軸登場嘅EXO連續表演三首歌，令整個節目完美結束。

精選韓流，喺晒《娛果》
http://fb.com/appledailyent