嚟緊星期日（6日）沙田馬場重頭戲，係2400米三級賽皇太后紀念盃，啱啱喺女皇盃獲得季軍、大摩馬房嘅「鷹雄」，據知極大機會繼續用柏寶操刀。

「鷹雄」乃上屆此賽冠軍，亦係上屆遮打盃第三名馬，路程有根據，爭三級賽夠卡士有餘，話唔定匆匆再出可贏馬補中。

今屆皇太后紀念盃，仲出現個罕見現象，就係雷神莫雷拉可能冇馬騎，雷神同杜利萊同時有興趣騎蔡約翰隻「哈蝦巴爸」，呢隻馬上場贏出二班田草2200米，正正就由杜利萊建功，按情理應繼續由杜利萊壓陣，但「哈蝦巴爸」負磅為115磅，可超兩磅至117磅，杜利萊亦未必造到，最終「哈蝦巴爸」會否遭雷神搶去，就要睇下杜利萊能否成功「減肥」了。

至於預期係皇太后盃熱門之一，上仗配柏寶跑第二輸俾「哈蝦巴爸」嘅本屆打吡季軍「時時精綵」，就會回配老拍檔潘頓，相信亦係坐位望贏嘅馬。