繼警隊之後，香港另一個重要執法部門亦將面臨大執位。廉政公署執行處處長李俊生今年中將會退休，廉署內部盛傳，佢個位將由「女神探」助理處長李寶蘭升職接任；由於呢個接任人明年極可能再升一級，接替明年底退休嘅執行處「一哥」李銘澤，換言之，李寶蘭極可能成為廉記歷來首位女執行處首長，名副其實做執行處「一姐」。
大家都知，1974年成立嘅廉署，殖民地時代全名叫「總督特派廉政專員公署」，直接向港督負責，回歸之後，就向特首負責，部門阿頭係廉政專員，但近十年八年，專員都係委任前政務官做，實際負責調查工作同部門運作嘅，主要係班喺廉記做咗三十幾年嘅老臣子。今年廉署踏入36周年，當年喺廉署成立冇耐就加入去做開荒牛嘅嗰班「五十後」，亦陸續退休。

加入廉署近26年

為方便讀者，八方喺度解釋吓，執行處係廉署最大部門，亦可以話係最重要，負責執法打大老虎，法例、政策亦要睇埋，由執行處首長統領，下面有兩個處長，分別領導負責私營機構同政府部門貪污案嘅調查人員，再下面仲有四個助理處長。
負責私營機構嘅執行處處長李俊生仲有幾個月就滿60歲退休年齡，將會離開做咗三十幾年嘅廉署。廉署中人非常關注邊個接替李俊生，因為執行處首長李銘澤如無意外明年底60歲退休，而負責政府部門嘅執行處處長黃世照遲佢幾個月亦會退休，因此接替李俊生嘅人選，差唔多篤定係執行處首長接班人。
八方聽聞，家呼聲最高嘅係李寶蘭。以做助理處長嘅年資嚟講，年約46歲嘅李寶蘭係四個AD之中最長。佢加入廉署近26年，據講係廉署派去美國FBI受訓嘅首個女調查員，負責過嘅案件包括海關高級督察儲克難為首嘅跨國犯罪集團賣外交護照案、毛玉萍案、Ba叔案、中原地產回佣案等等，早年被傳媒冠以「女神探」稱號。
呢啲人事調動對一般平民百姓又有乜重要性呢？八方認為，無論回歸前後，廉潔嘅獨立性備受關注，大家對廉署權力會否被濫用亦好關心，因此有乜重大人事變動，新人事有乜新作風，就好值得關注喇。
mailto:[email protected]