歌神許冠傑（Sam）呢幾日繼續喺紅館舉行演唱會，唔少圈中人捧場，仲俾Sam捉住合唱，不知玩得幾開心，原定噚晚請嚟無綫之前熱爆劇集《天與地》嘅陳豪、林保怡同黃德斌做嘉賓演唱《年少無知》，點知臨門撻Q。據馮仁昭聽到話因為林保怡突然向主辦單位要求再獨唱一曲，主辦單位話之前啲嘉賓都冇咁要求，結果一口拒絕咗，最慘係連帶陳豪、黃德斌都被拖累埋，冇得上台同Sam合作，呢啲真係一拍兩散。
前晚係港大包場，Sam請嚟同係港大校友嘅謝安琪（Kay）做嘉賓，Kay唱出由Sam作曲、林夕填詞嘅《明我以德》，仲有《獅子山下》等。

黎耀祥靚聲助陣

Sam在點唱環節時發現台下嘅黎耀祥，即刻落台同佢合唱《阿郎戀曲》，祥仔唱得似模似樣，難怪Sam都舉起手指公讚佢靚聲。至於大前晚就有早前宣佈陀B嘅羅敏莊同老公陳國邦撐場，Sam都有落台同準媽媽合唱《雙星情歌》。