立法會選舉投票日，巿民齊盡公民責任去投票，男神王宗堯、「大佬孝」邵仲衡、翁靜晶、「腦細」林日曦、河國榮、港姐麥明詩同何韻詩等都出動投票，邊個話藝人一定唔關心政治？
王宗堯噚日獨自現身灣仔愛群道票站，佢話：「投咗票個心定啲，今年大家希望踢走某啲人，大家想泛民入去，唔希望立法會入面咁多投票機器，我都諗緊點樣保住關鍵性一半嘅席位。」男神現身，令唔少女士送上心心，而佢亦大方停步同市民自拍，如果去選議員，肯定有唔少fans。
邵仲衡夫妻孖咇喺黃金海岸附近票站揀選新界西心水代表，對於民建聯周浩鼎同民主黨鄺俊宇超區惡鬥，邵仲衡話：「建制裏有好人，泛民裏都一樣有唔好嘅人，最緊要係理念……有理念都要有適當口才去表達。」有選民投票時出現「掌心雷」，佢無奈話：「唔好咁容易被人阻礙諗法，今時今日犯嘅錯，子子孫孫會去受，何必呢？」九龍西選民麥明詩噚日投票後話：「自己比較支持新晉嘅候選人。」何韻詩噚日投票後不忘喺facebook再作出呼籲，呢一票好緊要。

新界東選民翁靜晶則指：「近兩年好混亂，尤其今屆選舉真係好多『唔對路』。以前都知道有啲老人家投票都唔知自己做緊乜……有啲嘢去到一個完全扭曲咗正常嘢嘅時候，連我呢啲政治冷感嘅人都睇到就好嚴重。」佢仲批評：「我哋個政府實在太夾硬嚟，有好啲處理方法，可以令大家信服，偏偏唔去行大方大道，老實講外國選舉都唔公允，但起碼表面上係公義。𠵱家直頭過唔到對眼，過唔到自己嗰關。」

李八方
mailto:[email protected]