新馬季開鑼，上屆冠軍練馬師蔡約翰竟高掛免戰牌，下周三（5日）夜賽亦只有兩匹初出新馬報名。

相反，有幾個養馬量多的華倉，如葉楚航及蘇偉賢，近期加緊練兵，擺明車馬要在季初搶攻。

葉楚航是前冠軍練馬師，今期出六駒，其中第四場「勝在煌」及第五場「盛勢」，近況出色值得捧場。

第四場五班1200米，「勝在煌」上季受傷患纏身，左前腳多次被發現有健康問題，更曾兩度退出賽事，陣上演出未能以最佳水準示人，上季只跑過七仗，1月13日跑田草1400米後上獲亞軍，但之後再未有上陣，可見腳傷情況頗為嚴重。

根據馬會的傷患紀錄，6月下旬發現此駒的左膝部位腫脹，這是腳部退化的先兆，競賽里程所餘不多。

「勝在煌」今季7月26日已經開操，至今快跳了七課，8月17日試1200米泥閘輕鬆勝出，最近一星期再由潘頓親自操練兩課，動態相當積極，亦反映馬匹的健康情況穩定，老馬冇保留，蓄銳一擊今鋪搏殺。

第五場四班1200米，「盛勢」前季減分落到第五班贏馬開齋，但翌仗升上第四班連捷，實力大抵值四班頂約55分左右。

上季部署照辦煮豌，減分落第五班即輕鬆取勝，簡直視對手如無物。這匹英國自購馬現時才五歲，仍處當打之期，上場贏馬後加至47分，僅比前季贏四班賽時高一分。

此駒早前曾北上從化受訓一個月，最近一星期運往香港操練，晨課表現充滿新鮮感，狀態更勝上季贏馬時，今場對手實力一般，有力再下一城。