由49歲出爐金像獎影帝張家輝及吳彥祖演出、林超賢導演的電影《魔警》今個星期上映，戲中家輝一人分飾兩角，分別是警察及戴着「鬼王面具」、四處殺人放火的大賊。家輝今趟有另一突破，就是親身面對真火拍放火戲。
在《魔》開拍前張家輝已表明不會再練大隻，他說：「拍《激戰》嗰陣，餐餐白烚雞肉雞蛋，諗起都想嘔。所以同導演講，只要唔使再練大隻，乜都得！跟住導演就笑住咁講：『不如試吓放火燒你吖。』當初以為佢講笑啫，點知原來嚟真喎！」這場「火燒影帝」的重頭戲，講述飾演警員的張家輝被仇家上門放火報復，為救母親馮素波慘遭活生生燒死。由於現場採用真火拍攝，工作人員都熱到大汗叠細汗。

最辛苦是落妝

戲中為了營造被火燒到甩皮甩骨的效果，化妝師預先用麵粉和人造膠製好一張張假人皮，然後再逐一貼上家輝的臉和手腳，之後還要上色。每次拍攝張家輝都要花四個小時化妝，化妝後的家輝恍如喪屍非常恐怖。他說最辛苦還是落妝：「落妝麻煩好多，要搞成個幾鐘！因為啲假皮係用膠水貼上去，要用特別卸妝水先抹得走，但抹完之後成塊臉『挪住挪住』，一個個紅印，返屋企洗幾多次臉都唔得！」對於能否憑此片三度問鼎影帝，他表示片中戲份不多，機會應該是屬於男主角吳彥祖。
另外，準備接拍林超賢新作《破風》而苦練單車的台灣藝人彭于晏，近日練到雙手起水泡，昨更上載幾張摔倒擦傷背脊及手臂的照片，留言：「Day10又摔，挑戰100K（公里）失敗，只衝了82K。但好處是水泡它破了。」
撰文：李森