宋仲基同宋慧喬噚日嚟咗香港，出席今日喺中環四季酒店舉行嘅ViuTV開台記者會，雙宋之前雖然爆出姊弟戀，但佢哋今日現身記者會現場就完全冇避忌，仲有唔少身體接觸，特別係宋仲基好鬼有紳士風度，佢同喬妹影合照時就有意冇意搭住佢膊頭，又扶實佢條腰，唔知佢係有意定冇意，定係佢哋嘅緋聞唔係空穴來風。

其實單睇兩人喺台上嘅互動真係好鬼sweet，兩人喺台上嘅交流真係似足真‧情侶，不時情深互望，又sweet爆喺台上以拳頭撞拳頭，認真默契十足，難怪唔少粉絲都想兩人真係拍拖，譜出呢段姊弟戀。