恭喜恭喜！現年29歲、09年港姐冠軍劉倩婷前年下嫁堪輿學家李丞責，過了兩年二人世界後，本報收到消息，劉倩婷近日成功懷孕，準備明年生猴BB。
早於今年初，47歲李丞責已表明恨生猴B，原因是自己本身屬猴，肖猴的BB和自己及太太都很夾。想不到他們坐言起行，劉倩婷不停進補增肥，除了在年初四擺兒童碗筷催旺人丁，又上武當山拜神求子，李丞責更為仔女諗定靚名。

疑一索得男

記者昨日致電李丞責，他最初表現驚訝，支吾地說：「你哋點知㗎？其實有計劃嘅，我唔想Sandy（劉倩婷）太緊張，唔想咁多人搵佢，所以先唔講。（𠵱家幾多個月？）唔……都喺度努力緊！（知道仔定女未？）你睇我咁有信心就知啦！（係仔？）嗱，我冇講呀！你哋唔好亂估呀！」事後劉倩婷以WhatsApp回覆記者說：「丞李貴言，努力當中，希望盡快有喜訊和大家分享，多謝你們一路關心、祝福、支持。」
其實劉倩婷陀B早已有迹可尋，以往兩夫妻經常孖公仔現身公開活動，但最近數月就只有李丞責單拖出席活動，甚至劉倩婷母親在9月於上環開車仔麵檔，開張當日李丞責亦要代太太撐外母場。可見李丞責十分保護懷孕的太太，以免有閃失。
採訪：王梓嫚