呢幾個月嚟，馬德里體育會前鋒基沙文都跟曼聯拉上關係，日前佢接受西班牙傳媒訪問嗰陣大談轉會，話如果轉會的話，西甲、德甲同法甲都冇合適嘅目的地，仲話自己鍾意睇英超。不過，佢就唔好鍾意英國啲狗仔隊，擔心喺英國生活會冇晒私隱。

當然，25歲嘅基沙文劈頭就話最想留隊先，「喺皇家蘇斯達嗰陣，我覺得自己需要離隊，但喺呢一刻，我未有呢種想法。冇人知我哋季尾會有咩成績，如果好差，或者我會問自己呢條問題，但呢一刻我冇考慮。除咗問自己想唔想走，我哋會問自己可以走去邊。喺西甲，我屬意嘅係巴塞隆拿同皇家馬德里，但巴塞有『MSN』喺度，而皇馬就更加冇可能，因為我踢緊馬體會。至於德甲，呢個聯賽唔吸引我，而踢法甲就未喺時候。」

之後基沙文終於講到英超，「去英格蘭的話，我會擔心我會冇晒私生活，仲有好似天氣咁，怕英國成日落雨，我想場外生活都開心。」似乎對基沙文嚟講，喺足球範疇上，佢係樂意去英超。佢仲話自己好鍾意睇英超，「我鍾意英超球隊，踢嘅比賽好高強度。我成日睇英國波，球證執法令比賽好流暢，球場又成日爆。」當然基沙文臨尾都兜番句，「但今時今刻叫我揀，都係西甲啦，因為我喺度踢出自己最高嘅水平。」

PS：最可憐嘅係意甲，基沙文提都冇提過。