登登！今晚就係平安夜，營營役役嘅你，準備好迎接聖誕節假期狂歡未？

喺香港，個個都忙，尤其又要返工又要湊仔嘅新手爸媽，真係連唞氣都差啲冇時間，身為人母嘅朱薰都話：「除咗返工，我所有時間都畀晒佢哋。」日前佢同老公譚健榮難得抽空，帶埋對小寶貝去輕鬆下：「o依家係辛苦，但都係投資呢10年，希望打好個底，等佢哋廿幾歲嗰陣，有咩事都會返嚟搵我已經好好。」

朱薰同老公阿榮結婚8年，育有5歲半嘅囝囝譚永之（Liam）同2歲半大嘅囡囡譚在之（Liv），日前，佢哋就去咗馬灣提早慶祝聖誕節，騎電動鹿車、整熊仔同夾糖果。甫到達，Liam見到電動鹿車即刻大叫好想玩，仲拉住爸爸要「賽鹿」，小公主Liv就怕醜啲要黐實媽咪。湊住兩個小朋友，真係一啲都唔容易，朱薰先帶住Liv喺鹿仔車前面行，又同佢唱聖誕歌，Liv先慢慢熱情起嚟。

講到聖誕節，Liam好興奮咁話有聖誕老人送禮物：「我喺屋企明明見到聖誕樹下面冇禮物，擰轉面再望就有啦，聖誕老人喺煙囪掟啲禮物入嚟。」阿榮就問囝囝，屋企支煙囪喺邊？Liam諗咗一陣話：「屋企冇煙囪，佢喺冷氣機度走出嚟。」Liv就好溫柔咁話扮過聖誕鹿表演唱歌，仲即場唱咗幾句。正當朱薰、阿榮同Liv坐喺鹿仔車上面，分享緊屋企點佈置聖誕嗰陣，喺後面玩緊鹿仔車嘅Liam，整蠱媽咪同妹妹，突然開住鹿仔車，嚇到妹妹Liv流咗幾滴眼淚。朱薰安慰完妹妹，就轉身同哥哥講：「哥哥頭先係咪做咗啲曳嘢？你唔好玩住，同妹妹道歉先。」

朱薰話：「大家見到哥哥蝦妹妹，其實平時係妹妹蝦哥哥㗎，佢會攞哥哥啲嘢，不過哥哥又唔會同佢爭，好多時都讓妹妹。我睇到多數都由佢哋自己搞掂，唔會插手，搞唔掂先等佢哋逐個同我自白。我湊小朋友就好似《西遊記》入面羅家英做嗰個唐僧咁，煩！煩到佢哋唔想再做曳嘢，不停煩，不過呢個過程好漫長，可能要3、4年先見到效果。」小朋友唔會突然變乖，所有嘢都係累積而嚟。朱薰笑謂做父母，個個都係由新手開始：「一路教一路學，你以為自己用啱方法嗰陣，佢哋又大個咗，所以我都係不停迷惘、不停學習。好多朋友都問我做咩唔去玩吓，其實我除咗工作，就畀晒啲時間佢哋，係投資呢10年，希望打好個底。十幾歲佢都有自己朋友同生活啦，o依家係希望佢哋廿幾歲嗰陣，有咩事都會返嚟搵我、有心事同我傾就已經好好。」

喺香港，做父母好似特別難，個個都求分數、追名校、趕住贏在起跑線，朱薰自嘲係異流：「香港係難嘅，兩個都要做嘢，想畀多啲時間小朋友？但係又學費、又校服、又校車，好難可以有一個做全職去照顧佢哋。社會嘅風氣，又令父母好緊張，我覺得自己好似異流，個個衝去考名校，如果我諗住讀普通學校、開開心心，就好似小眾、好怪咁，所有都要自己去抵抗呢個洪流，係有難度嘅。」

場地：香港挪亞方舟

精選娛聞，喺晒《娛果》
http://fb.com/appledailyent