深水埗和諧式公屋富昌邨共有六千多個單位，單位鐵閘通風口被住戶投訴設計過闊，令匪徒容易伸手入內開閘，有區議員指共接獲數十名居民投訴，且農曆年前後每月平均發生兩三宗入屋爆竊案，惟房屋署拒絕作出改善，居民要自費加裝鐵片加強保安，令居民大為不滿。

富昌邨居民向本報投訴稱，屋邨單位的鐵閘設計甚有問題，鐵閘底部設有多個通風口，可是這些通風口卻過闊，可讓人從通風口伸手入閘內，將鎖打開，設計欠善。
「個通風口咁闊，啲賊趁無人嗰陣，好容易伸手入嚟開鎖，我知道有啲住戶就咁俾賊入屋爆竊，我哋啲住戶惟有搵人喺個通風口度加塊鐵片擋住，但係又要自己畀錢。政府係業主，有乜理由個閘設計有問題，要啲住戶自己諗辦法出錢補救！」

鐵閘卡住不能開啟
此外，大閘的閘鎖質素亦被投訴欠妥。居於富盈樓的黃先生投訴稱，鐵閘的開關一向不大暢順；早前他欲出門時，鐵閘竟卡住，不能開啟，他惟有致電管理處求助；管理處為他召鎖匠，將閘鎖撬爛及更換，他才可出入。
黃先生不滿說：「咁換一換鎖，就使咗我450蚊，個開鎖佬話呢條邨啲鎖唔好，成日有問題，佢都嚟整過幾戶；好彩今次只係破財，如果有乜事要逃生，道閘開唔到就弊嘞。」
房屋署副房屋事務經理文先生回覆本報查詢時表示，過去曾收到居民反映鐵閘通風口過闊，擔心匪徒容易伸手入內開閘，但房署暫未考慮於通風口位置加上鐵片，只會加強既有保安系統，如加強巡邏等。