金利來（533）06年度中期（6月止），自祖國業務收入，貼近3億銀，拍得住內銷龍頭寶姿（589）（寶姿同期祖國收入3.5億銀人仔）。金利來內銷因素夠晒爆炸，但市場走漏眼。又金利來最新中期純利大升86%到8397萬銀，連埋投資物業重估收益計，估計全年度純利1.5億銀，06年度PE不過8倍水位。同類內銷股，06年度PE，講緊20、30倍樓上，金利來現價，實情賣大包。
再講，金利來奉行高息政策，06年中期已經每股派息3.3仙，估計全年度派息8.9仙，息率高達6.6厘，又係內銷零售股中，息率回報吸引嘅股份。係咁易以金利來06年度10倍PE做目標，金利來現價（1.33元）潛在回報率25%，但仲係相對同類股落後。又純技術走勢，金利來由上年4月到11月，一路兜底，呢期突破兼做埋後抽，隨時起錨。

永安旅遊（1189）現價（0.59元）相對NAV2.09元折讓70%。即係話，以NAV3折價錢，買到永安旅遊，吸引到痹。集團34億銀嘅總資產當中，佔近半數（17億銀）係酒店物業及機器組合，實淨到爆。
又集團有批7.8億銀可換股票據（CN），CN換股價0.79元。港股狂牛，大家肯花費歎世界，買香江經濟好景，永安旅遊係有point炒上，CN持有人有機會行使。短打先睇CN行使價0.79元，潛在回報率33%。
錢雋