會計師Ｎ一班中學同學，慶祝畢業二十五年，由上市公司董事Ｆ召集，到酒店舉行晚宴，董事Ｆ搵到幾十位同學，聲明攜眷參加。
如果人人一拖一，應該超過一百人。會計Ｎ到咗酒店一望，咦，少啲噃，頂多得八十幾位，坐定之後，各人話舊一番，緬懷昔年在半山區名校返學嗰種頑皮法及會考溫習法，嘻哈大笑。從談話中，會計Ｎ得知有一半同學冇結婚，女同學不婚比例最高。呢間名校盛產律師、會計師、醫生。醫生多是男性，個個話工作時間太長，冇時間拍拖；好多女同學係律師、會計師，又話冇男仔追，索性唔嫁。會計Ｎ結咗婚，生有一子，返母校讀書，人人讚佢幸福。

會計Ｎ話，「我哋呢班四十歲出頭之人，今天佔香港人口比例最多，二十年後我哋退休，當然係佔人口比例最多，到時邊度夠人工作交稅，養我哋呢代？」想有人養？無謂發夢，自己搵定退休金可也，正是佢哋呢班四十零歲之人少結婚、少生仔女，先至令到𠵱家學校收生不足！譬如董事Ｆ係著名叻女，係女強人，嫁咗之後，邊度有時間生兒育女吖，否則點會做得成女強人？
下一代又如何？會計Ｎ叫個仔寫篇文，講「我的志願」。小Ｎ話：「乜你咁煩㗎，好老套啫。」會計Ｎ話：「你寫吓做警察、消防員、巴士司機都得㗎，將來你想做邊樣吖？」小Ｎ答：「從未諗過喎，點解要諗？」會計Ｎ為之冇符，小Ｎ班男同學人人識玩一件樂器（因父母催谷），英文唔錯（因直資名校催谷），中文就麻麻（因從來唔肯睇報紙），放學後平時衣着永遠係超大件Ｔ恤、三個骨褲、波鞋，鍾意打機。會計Ｎ出身小康之家，與自己個仔一樣年紀之時，已知道搵食不易，但佢位公子跟住佢飲慣食慣嘆慣，以為一切美好事物，係理所當然。將來佢哋如何與十三億人競爭，諗吓就驚。