容祖兒都上《流行經典50年》？就連100毛都要出post抽水，引述網民質疑，話Joey得30幾歲，邊有紅咗五十年咁耐？

係，祖兒雖然無50歲，但100毛幫佢精心度咗條方程式，計埋佢總共有23首得獎歌，當中有七首已經流行咗十年，咁樣加下加下，祖兒總共紅咗最少162年。

其實呢，只得33歲嘅李彩樺，都曾經上過《流行經典50年》，所以，唔使太認真。

講番噚晚祖兒錄影節目，同場仲有薛家燕、區海倫、袁鳳瑛同陳明熹等等，無綫仲好貼心咁，送上蛋糕慶祝佢出道18年：「冇諗過電視台對我咁好，為我慶祝咁大嘅日子」，又開玩笑指自己今年「18歲」：「我一出世就出道喇，所以唔會覺得有遺憾。」

未夠半百就擔任「經典50年」，容祖兒話其實真係好耐冇去電視台表演，仲話今次係為咗媽媽先至上嚟，因為容媽媽鍾意睇呢個節目嘛。

大家都好關心祖兒係咪真係事先張揚缺席來年樂壇頒獎禮，噚晚再問祖兒今年會唔會出碟，佢就話傾緊：「前期準備工作需時，時間就比較難控制。如果今年真係趕唔切出任何專輯，咁我就當休息一年啦。」其實答案已經好明顯。

唔好唔記得，同場仲有退出樂壇廿幾年嘅前ECHO成員區海倫，估唔到佢都出山喎。係咁話自己好緊張嘅區海倫話，兩個仔都咁大個喇，所以好多朋友都鼓勵佢復出，佢就話有啲擔心：「我驚我個仔突然要我幫佢做啲大單嘢，但我又要唱歌，我驚兩邊都做唔好。」但佢話會認真考慮出碟同出番嚟唱歌。