今日晨咁早(8點)，盛品儒、鮑起靜、台灣歌手邱勝翊(王子)等就齊集將軍澳一間中學出席電影《哥基王子》開鏡拜神儀式，而有份為電影贊助珠寶嘅蔡一鳳亦有連同男友盛品儒現身。盛品儒講完未婚妻，話題又講番葉家寶接受本報專訪剖心表明要同亞視共存亡，盛品儒就話，佢同葉家寶及黃集鋒都有聯絡，為佢哋打打氣：「冇辦法，股東爭拗，不過亞視咁多年都係困難中度過。」

盛品儒又話對情況依然樂觀，希望事情快啲得到解決。問到佢會唔會覺得依家不在其位好好彩？佢話：「唔好咁講，我走嗰時都失落0架，嗰陣判決對我唔公平，冇辦法。嗰時亞視都係困難當中，仲要踩多腳踢走我，依家亞視有困難局面唔係冇原因，希望盡快搞掂。」

之前盛家已經話，注資二十億現金，認為已完成對亞視嘅歷史使命，但依家盛品儒依然放唔低咁……其實當日盛品儒走，事件起因係通訊事務管理局調查亞視，報告裁定股東王征干擾亞視日常管理及運作，指出獲授權管理亞視嘅時任執行董事盛品儒對王征言聽計從，仲竄改六份會議紀錄內容，掩飾王征指示或訓示員工的真相，企圖誤導通訊局調查。通訊局決定向亞視罰款100萬元，並指令七日內須終止盛品儒的一切職務。最後亞視趕及死線前(去年9月1日)宣佈盛品儒辭去執行董事職務，由大公報前高層雷競斌接任。盛品儒向本報表示會「先休息一下」，又強調現時與亞視「沒任何關係」。

而鮑姐對於亞視困境就話自己真係好擔心：「會覺得亞視係咪最後關頭呢？呢個係亞視有史以嚟最困難時期，希望大家可以安然度過，依家要等有心人接棒，如果冇就要睇下政府點。」