鬍鬚曾通波仔要留醫一星期,石禮謙噚日已經喺屋企休息,事關佢已第六次通波仔,習以為常;對上一次今年7月通完,事隔唔夠半年血管又塞過,情況有幾嚴重可想而知。佢同八方講,歷年來通波仔多次,身上已有五個血管支架,今年7月加多六個,日前再加多三個,家陣心臟血管總共有14個支架!
雖然心臟病嚴重,不過石禮謙睇得好開,噚日錯失投票機會,今個月18號立法會財委會正式表決撥款時佢一定會出席投支持票,自己條血管通咗,最好高鐵都盡快通車咁話,「值得支持嘅事,就應該要做。」對於被指擔任大財團要職,支持興建高鐵涉嫌利益衝突,石禮謙話太過上綱上線,所謂潛在利益「間接到阿媽都唔認得」,如果咁都要避嫌唔投票,工聯會議員也不應投票,「佢哋支持興建高鐵,好多工人有工做,好多着數喎!」