世界咁大，好多事都無奇不有，有唔少人深信呢個宇宙係有外星人，亦有人話曾經見過UFO，當中以解剖外星人事件呢場「鬧劇」，令香港觀眾最深刻…大家會諗起《今日睇真D》。余詠珊當年由無綫過檔，做亞視綜藝節目「揸fit人」，創《今日睇真啲》呢個節目嚟撼對台，而呢個節目監製係梁偉雄。

仲記得1995年嗰陣，亞視播「解剖羅玆威爾外星人」片段，轟動全城，亞視成功撼低無綫《城市追擊》嘅收視，同時亞視又製作相關節目，派節目主持去美國羅茲威爾做採訪，講到似層層，《今日睇真D》主持聲稱「50年從未公開嘅外星人解剖片段」，當時都有講出影片疑點，片中人啲動作有時唔連貫，影片係黑白，而且冇現場聲，近距離拍攝每次都對唔到焦點。

點知經過一個月，就被周刊先爆影片疑似偽造，無綫《城市追擊》更推出《踢爆解剖外星人》專輯反擊，指出影片係當時電影特技，同年10月，外國公司都認呢條片係偽造。

90年代轟動全球《羅斯威爾外星人解剖》黑白紀錄片係造假，58歲電視監製Spyros Melaris最近喺倫敦揭開秘密(新聞連結： http://bit.ly/2hvW5d0 )，片中嘅外星人屍體係由特效專家John Humphreys製作，內臟就係從肉舖買啲羊腦、雞內臟同豬蹄返去放入去凸眼外星嘅模型中，曾經考慮用樹莓果凍充當外星人腦，但嫌啲顏色太暗。

佢坦言當年製作呢條片純粹為搞笑，o依家對呢件事感到好後悔，承認低估咗大眾反應，冇諗過有人將影片當作外星人存在嘅證據。

Spyros Melaris聲稱參與過拍《解剖外星人》，影片喺倫敦一個住宅單位取景，「解剖」用嘅1940年代醫生外套同醫療器材，係由英、美嘅道具供應商度買，負責解剖嘅「政府病理學家」分別係自己嘅兄弟及女友扮。其實早喺2006年時，特效專家John Humphreys已坦承此片係造假，佢用咗四個禮拜用乳膠去做凸眼外星嘅模型，John Humphreys演解剖外星人屍體嘅外科醫師，拍完呢條片，假外星人模型被切成幾件，分散掉喺倫敦各處嘅垃圾桶。